1 Kings 2
1 大衛臨終个時，吩咐佢个孻仔所羅門講：
2 「𠊎離開世間个時到了。你愛堅強，愛做大丈夫。
3 你愛遵守上主—你上帝个命令，實行佢个道，順從佢所有个法律誡命，就係該兜記在摩西法律書个命令。恁樣，無論你到㖠位，你所做个逐件事全部會當順利。
4 若係你順服上主，佢一定會守佢个應許，就係講：𠊎个後代若係謹守佢个命令，一心一意對佢忠心，佢等就做得永遠統治以色列。
5 「還有一件事，你知洗璐雅个孻仔約押得罪𠊎，㓾掉以色列軍隊个兩個元帥，尼珥个孻仔押尼珥，㧯益帖个孻仔亞瑪撒。你愛記得，佢在太平个日仔㓾掉佢等，像在戰爭中㓾人共樣。因為佢㓾掉無辜个人，𠊎卻為佢所做个事來㧡責任，為這事个後果受苦。
6 所以你愛用你个智慧來處理，毋好俾佢恁好死。
7 「你愛好好來款待基列人巴西萊个孻仔，照顧佢等；因為𠊎逃閃若哥押沙龍个時，佢等好款待𠊎。
8 「還有，巴戶琳个便雅憫人，基拉个孻仔示每；在𠊎愛去瑪哈念該日，佢用當毒个話來咒罵𠊎。毋過，後來佢到約旦河迎接𠊎个時，𠊎指等上主个名發誓毋㓾佢。
9 總係你做毋得算佢無罪。你係聰明人，你知應該樣般做；一定愛想辦法將佢㓾死。」
10 大衛過身以後，葬在大衛城。
11 佢做以色列王四十年：在希伯崙統治七年，在耶路撒冷統治三十三年。
12 所羅門承接厥爸大衛做王；佢个國非常堅固。
13 後來，哈及个孻仔亞多尼雅去見所羅門个阿姆拔示芭。拔示芭問佢：「你係為到和平來个麼？」佢講：「係為到和平。」
14 然後又講：「𠊎有話愛㧯你講。」拔示芭講：「你講。」
15 亞多尼雅講：「你知𠊎本來應該做王；以色列人全部也希望𠊎做王。總係事情个經過並毋係恁樣；𠊎个老弟反轉做王，因為這係上主个旨意。
16 這下𠊎有一件事愛拜託你；求你毋好拒絕。」拔示芭講：「你講看仔。」
17 亞多尼雅講：「拜託你代𠊎要求所羅門王將該書念个細妹仔雅比莎給𠊎做𡜵娘；𠊎知佢毋會拒絕你。」
18 拔示芭講：「好，𠊎代你去向王要求。」
19 所以拔示芭去見所羅門王，為亞多尼雅向王講情。王企起來迎接厥姆，向姖行禮，然後坐在寶座，又喊人另外放一隻座位在佢右片，給厥姆坐。
20 拔示芭講：「𠊎有一件細事情要求你，請毋好拒絕。」王問講：「阿姆，係麼介事？𠊎毋會拒絕你。」
21 拔示芭講：「請你將書念个細妹仔雅比莎給若哥亞多尼雅做𡜵娘。」
22 所羅門王應厥姆講：「你做麼介愛𠊎將書念个細妹仔雅比莎給亞多尼雅呢？你樣毋喊𠊎將王位也讓給佢！你知佢係𠊎个阿哥，還有祭司亞比亞他㧯洗璐雅个孻仔約押擁護佢！」
23 所以所羅門王指等上主个名發誓：「亞多尼雅敢恁樣要求，𠊎若無收佢个命，願上帝大大責罰𠊎！
24 上主已經選𠊎，使𠊎穩穩坐在吾爸大衛个王位，又應許將這國給𠊎㧯𠊎个後代。𠊎向永生上主發誓，亞多尼雅今晡日無死做毋得！」
25 所以，所羅門王下命令給耶何耶大个孻仔比拿雅；比拿雅就去將亞多尼雅㓾掉。
26 所羅門王對祭司亞比亞他講：「你轉自家个家鄉亞拿突去！你本來係該死个，總係𠊎這下毋㓾你；因為你在吾爸大衛个時代扛過上主个約櫃，也識㧯吾爸共下承受盡多苦難。」
27 所羅門就解除亞比亞他个職位，毋准佢做上主个祭司。恁樣就實現上主在示羅所講有關祭司以利㧯佢後代个話。
28 約押聽到所發生个事就逃到放約櫃个聖帳篷肚，抓等祭壇个角。(雖然佢無擁護押沙龍，總係擁護亞多尼雅。)
29 所羅門王聽到這個消息，講約押已經逃到放約櫃个聖帳篷肚，囥在祭壇堘頭，所羅門就派人去問約押做麼介愛逃到祭壇該位。約押講佢逃到上主該位係因為驚所羅門。所以，所羅門王就派耶何耶大个孻仔比拿雅去㓾約押。
30 比拿雅到放約櫃个聖帳篷該位，對約押講：「王命令你出來！」約押講：「無愛！𠊎愛死在這位。」比拿雅轉到王該位，向王報告約押所講个話。
31 王講：「照佢自家个話㓾死佢，然後將佢埋葬。𠊎㧯吾爸大衛所有个後代毋使為約押㓾無辜人个罪來負責。
32 上主愛約押自家揹㓾人个罪，因為佢瞞等吾爸大衛去㓾人。約押㓾掉兩個比佢較好又較正直个人，就係以色列軍隊个元帥尼珥个孻仔押尼珥㧯猶大軍隊个元帥益帖个孻仔亞瑪撒。
33 約押㓾人个罪愛永遠歸佢㧯佢个後代；總係上主愛使大衛个後代承接佢个王位，得到平安直到永遠。」
34 所以，耶何耶大个孻仔比拿雅到放約櫃个聖帳篷該位，將約押㓾掉，葬在曠野約押自家屋下个墳墓。
35 王派耶何耶大个孻仔比拿雅代約押做全軍个元帥，又任命祭司撒督代亞比亞他个職位。
36 王派人喊示每來，對佢講：「你來，在耶路撒冷為自家起屋，愛住在這位，毋准離開這城。
37 若係你離開，超過汲淪溪，該日你就一定會死；流若血个罪歸在你自家。」
38 示每應講：「吾主吾王，你講个係盡公當，僕人會照你个話去做。」所以示每在耶路撒冷住當久。
39 總係三年後，示每个兩個奴才逃到迦特王瑪迦个孻仔亞吉該位。示每聽講佢等在迦特，
40 就預備驢仔，到迦特王亞吉該位尋佢个奴才，尋到就帶佢等轉來。
41 所羅門王聽到示每離開耶路撒冷、去迦特、又轉來个事，
42 就派人喊佢來，對佢講：「𠊎識喊你指等上主个名發誓，絕對毋離開耶路撒冷，又警告你講，你離開該日就係你死个日仔；你毋係答應愛聽從𠊎嗎？
43 你做麼介違背自家所發个誓㧯𠊎个命令？
44 你心肚也當清楚你頭擺對吾爸大衛所做个壞事。上主愛因為這壞事責罰你；
45 總係上主愛賜福給𠊎，使大衛个王位永遠堅固。」
46 所以，王下命令給耶何耶大个孻仔比拿雅，佢就去將示每㓾掉。恁樣，所羅門就完全堅固佢个王國。